Ɛɛ' ‑muu" ‑nɛ
('Dʋ 107‑150)
‑Kai" 'matɛ' Tʋ "bo nyʋ ‑seie i
107
Ao 'bɛɛ‑ Tʋ "bo 'a 'nynɩ "i,dɛ ‑nʋɛ ɛ nmɔ 'diwɔn,
ɛɛ' nyʋ 'a wɛe 'jea' se "ti ‑ta 'ble.
2 Nyʋ "klein Tʋ "bo 'pʋʋa,
‑wɛe ɛ ‑seia' 'de ʋʋa' 'tʋnyʋ 'kwa, ʋʋ 'tmʋ ɛɛ' ‑tɩ'.
3 Nyʋ ɛ ‑sa 'blʋɩ 'dii 'de 'jrʋ 'a 'wlʋɩn' o,
'jrʋ 'a blu 'ɩn o 'de "jɛi o, 'de 'jrʋ ‑sɔin ‑wɛe ɛ 'kɩɩan a "jru i ɛ.
4 Ʋʋa 'craa 'de ‑pɩɩɔn" 'blʋa "kpei,
‑ta ‑kwlɔ jrɛ' sea nɩ nyɔ 'jea "ti ɛ.
5 'Mɩɩɛ ke "ni 'na tʋn dba ʋʋpʋ‑ 'mɛ, ʋʋ ‑wee'‑ "jrooa "i.
6 ‑Ta ʋʋ nɩa 'e 'kle 'di ɛ,
ʋʋ 'da Tʋ "bo 'mɛ ‑wɛe ɛ ‑seie ʋʋpʋ‑.
7 Ɛ 'poɛ ʋʋpʋ‑ ‑je ‑srɛai" o,
‑wɛe ʋʋpʋ‑ 'je ‑kwlɔ ‑nɩa 'di "ti ka 'di "ti ka nɩ‑.
8 Ʋʋ 'bɛɛ‑ Tʋ "bo 'a 'nynɩ "i 'de ɛɛ' nyʋ 'a ‑tɩ' kmaa' ke,
dɩ 'dɔe ɛ nʋa 'de nyʋ ‑pee.
9 Nyʋ "ni 'na tʋn a nʋa ɛ ‑sa ‑mʋ ‑wi" "ni 'na tʋn 'ʋn 'ɛ,
nyʋ 'mɩɩɛ ɛ nʋa ɛ "nyɩɛ ‑mʋ ‑wi" diidɛ 'dɔe.
10 Jrʋ' nɩɛ 'de kwie kpan 'di,
'de 'kle 'a ‑gbae cɩɩɛ' 'di.
11 Dɛ ʋʋ blaa Kea ‑nɩa 'e jaʋn 'di 'a wlu wɛin, ‑wɛe 'srɩn Kea ‑nɩa 'e dɩ ‑wee'‑ "klein "jrukpɔ' ‑tu" 'a ʋʋpʋ‑ ʋʋ poɛ 'blʋʋɔ i,
12 ɛ ja ʋʋpʋ‑ 'kle "kpei ɛɛ jea ʋʋpʋ‑ i 'nyɛ,
ʋʋ se 'e ‑sai 'ble.
13 ‑Ta ʋʋ nɩa 'e 'kle 'di ɛ, ʋʋ 'da Tʋ "bo 'mɛ ‑wɛe ɛ ‑seie ʋʋpʋ‑.
14 Ɛ ‑sa ʋʋpʋ‑ 'de kwie kpan 'di,
‑wɛe ɛ cɛn ʋʋpʋ‑ ‑gbae cɩɛɛ' "dbu kwii.
15 Ʋʋ 'bɛɛ‑ Tʋ "bo 'a 'nynɩ "i 'de ɛɛ' nyʋ 'a ‑tɩ' kmaa' ke,
dɩ 'dɔe ɛ nʋa 'de nyʋ ‑pee.
16 Ɛ ‑craa‑ nɩɩɛ klu i,
‑wɛe ɛ cɩɩɛn ɩa' nɩɩɛ ‑gba i.
17 Nyʋ ‑nɩa 'e dɛsaʋn 'di ‑wɛe ɛɛ' tai' "maa,
ʋʋ 'kpa wɛenyʋ 'de ɛɛ' ‑tɩ' 'ʋn.
18 Diidɛ jrɛ' 'ɛ pa ʋʋpʋ‑ wɔn,
'sʋ ʋʋa 'jea 'mɛɛa' i "kʋʋan‑.
19 ‑Ta ʋʋ nɩa 'e 'kle 'di ɛ,
ʋʋ 'da Tʋ "bo 'mɛ ‑wɛe ɛ ‑seie ʋʋpʋ‑.
20 Ɛ wlua 'sʋ ɛ ʋʋa' 'wɛ 'bɔɔ,
ʋʋ 'pʋɛ 'mɛ "bie "wɛin.
21 Ʋʋ 'bɛɛ‑ Tʋ "bo 'a 'nynɩ "i 'de ɛɛ' nyʋ 'a ‑tɩ' kmaa' ke,
dɩ 'dɔe ɛ nʋa 'de nyʋ ‑pee.
22 Ʋʋ 'je Kea sɛ' po 'sraa‑ ‑sa,
‑wɛe ʋʋ 'je ɛɛ' nʋʋdɩ 'a "kuuan po 'de 'mʋa‑ 'ʋn.
23 Jrʋ' 'a jiiɛ 'de "ni "kpei,
‑wɛe ‑ʋʋa nʋ dbo 'de "ni klae" klae" wɔn.
24 Nyʋ ‑wi" ‑nɩa 'mʋʋa‑,
'je Tʋ "bo 'a nʋʋdɩ "jriɛ 'mɛ 'de "ni bie'.
25 Ɛ wlua 'sʋ ‑piee klaa" ji',
ɛ kpa 'tɔniɛ 'ɛ 'plɩ 'jɛi".
26 Ɩa nʋ ‑paa 'de jaʋn ‑kwlʋ, ‑ɩn ‑cɛi' 'de "niɔ 'de.
'Sʋ faʋn 'kpa 'de ʋʋpʋ‑ 'ʋn 'ɛ.
27 ‑Taʋn ‑taʋn' 'kpa ʋʋpʋ‑ "jri,
'sʋ ʋʋa na' ‑piaan"‑ ‑pian",
ka nmɔɔ nʋa nyʋ ɛ.
Ʋʋa' pɛe ‑wee'‑ "biɛɛ "jrii.
28 ‑Ta ʋʋ nɩa 'e 'kle 'di ɛ,
ʋʋ 'da Tʋ "bo 'mɛ ‑wɛe ɛ ‑seie ʋʋpʋ‑.
29 Ɛ nʋʋɛ ‑piie pooɔ' "flee flee 'ʋn,
‑wɛe ɛ jaa "ni ‑gboo ja.
30 ‑Piie ‑jia' ja nɩɛ ʋʋpʋ‑ 'a 'mʋa‑ ‑tɩ o,
‑wɛe Kea kpa ʋʋpʋ‑ 'de 'kpʋʋ ʋʋ nɩa "i ‑kwlɩ".
31 Ʋʋ 'bɛɛ‑ Tʋ "bo 'a 'nynɩ "i 'de ɛɛ' nyʋ 'a ‑tɩ' kmaa' ke,
dɩ 'dɔe ɛ nʋa 'de nyʋ ‑pee.
32 Ʋʋ 'bɛɛ‑ ɛɛ' 'nynɩ "i,
‑ta ʋʋa' 'cɛ ‑wee'‑ 'kɩɩan "jru i ɛ,
‑wɛe ʋʋ 'jeɛ 'nynɩ ‑sa,
‑ta nyʋ ‑cɔɩn'‑ 'kɩɩan "jru i ɛ.
33 Tʋ "bo 'bɛɛ' ɛ 'jeɛ nʋ "ni ‑gbii 'je ma,
'bo 'je 'kpaa "kpei nɩ.
Ke 'wlɛ ɛ 'jeɛ nʋ "ni 'a "jru 'je ma ɛ 'je 'sʋɛ jɛ.
34 'blʋa ‑nmɔa 'je 'tɔn 'blʋa 'ʋn ‑srɛɛn,
‑bo nyʋ ‑nɩa 'de ɛ "kpei 'dinyniwɔn ɛ.
35 Ɛɛ pooɛ ‑pɩɩɔn" 'blʋa fai",
ɛ je a "ni fla' klaa" nʋ,
‑wɛe 'de 'kpaa "kpei,
‑mɛɛ' ‑srɛɛn' "ni 'a "jru 'ʋn.
36 'Bo mɔ ɛ ‑te' nyʋ 'mɩɩɛ ɛ nʋa.
‑Wɛe ʋʋ ‑tu" ‑kwlɔ ʋʋ 'je 'o "ti.
37 Ʋʋ 'dba ‑kle' ʋʋ ‑tuɛ" Fiinyɛ,
‑wɛe ‑mɩ a cro 'jɔ ‑tuu".
38 Ɛ poɛ ʋʋpʋ‑ "diwan‑,
ʋʋa ‑gbɛn' ʋʋa' "nɔdɩ 'a sɔɔ wɛi.
39 Jrʋ' cɛn "kpei ʋʋ siɛ sɛ klɛɛ ka,
"nmia 'a 'sʋ 'nyɛ ʋʋpʋ‑ "kpei,
dɩ ‑wee'‑ ‑kwɛ ʋʋ 'kwai ‑wɛe ʋʋa 'je 'kle.
40 Kea ‑sa nyʋ "klae' ‑suu "kpei,
‑wɛe ʋʋ sie ‑jeblʋ,
ʋʋa du 'kwla 'de ‑pɩɩɔn" 'blʋa "kpei.
41 Nyɔ "nmia 'a 'dba ɛɛ kpɔ 'jɛi" ‑wi"
‑wee'‑, ‑wɛe ɛɛ ‑sɔ' "kwie i,
'ɛ nʋɛ' 'sʋ ‑gbɛin" a wɔn jea "kwli 'wlʋ,
ka nɔ" dɩ 'a ‑gbʋn nɩa.
42 Nyiɔpʋ‑ ‑srɛai" 'jeeɛ "jriɛ 'sʋ ʋʋa nʋɛ 'mʋa‑,
'kaa dɛsaʋn "o dɛsaʋn a muɛ nyʋ 'a wɔn.
43 Nyɔ 'o nyɔ ‑nɩa tɔ'di 'de ɩa' "jriɛ o sia' 'ʋn ɛ,
ɔɔ muɛ Tʋ "bo 'a 'diwɔnmɔa' juua'.